In nouvo nom po Le Pas de Bellecombe

Lo nom po lo col de montagne, in bébéte poin-d’vu par an-0 lo Nor-Louést lanklo Fouqué, lo dèrnié caldéra Piton La Fournaise, la-gaingne la grandër par lo nom lésklav la-dékouve lo shomin lanklo. Koméla, landroi-la i apèle Le Pas de Bellecombe-Jacob.

Dann in léspédisyon volkan lané 1768, lo gouvèrnër Léonard de Bellecombe, ansanm lo déssidër Honoré de Crémont èk bann zésklav portër la-arive dessi lo bor lanklo. Konm lü la pa trouve in shomin po déssande anndan, lo gouvèrnër la-artourne ouça lü té i sorte. M. Crémont, plüs vayan, la- kontinüé épila la-promète done 6 piésse la toile bleu po bann zésklav i niabou trouve in shomin dann ranpar-la. Malgré lü la-rode lontan, lésklav Jacob la-fini par trouve in passaj épila la déssande dan lo ranpar ansanm M. de Crémont.
Malgré lo gouvèrnër la jamé déssande dan lanklo, la-done son nom landroi-la, le Pas de Bellecombe.

Lo mèrkrédi 28 out 2019, lo maire Sinte-Roz, Michel Vergoz, la-poze in plak déssi lo parking èk lo nouvo nom landroi-la Le Pas de Bellecombe-Jacob, an-lomaj po lésklav la-rouve lo shomin po alé jiska lanklo.