Parlman Lërope i arkoné lésklavaj konm « krime kontr’ demounité »

Vandrédi 19 juin inn gran majorité Parlman Lërope la-vote in déssizion sinbolik i arkoné lésklavaj konm « krime kontr’ demounité.»

Proposizyon-la, porté par Younous Omarjee, dépüté rényoné Lërope, la-rante dann déssizion dessi bann maniféstasyon kontr’ lo rassism apré la mor George Floyd.

Younous Omarjee la-di dovan Parlman Lërope : I fo nou voi çak la-arivé i ranvoye anou plüzièr sièk dominasyon bann Noir Zéta-Zuni èk sitüasyon linégalité dann Lërope. Fo pa nou oubliye listoir ëropéène la toujour balansé, konm in gran lorloj rantr’ la barbari èk la sivilizasyon. Cé dann Lërope mèm, kanmèm la rézon, kanmèm Les Lumières, lé éné bann pir téori iérarshizasyon la rasse demoun po justifié linvazion lézot péi, po justifé lésklavaj, po justifié la kolonizasyon, po justifié l’’Holocauste.

Ala lo tèks adopté :
Parlman Lërope i invite bann zinstitusyon èk bann Zéta i fé parti Lünion Lërope po zot arkonète ofissièlman tout çak té injüste dann tan passé, èk toute krime kontr’ demounité perpétré kontr’ bann demoun noir èk bann demoun koloré ; i déklare vande zésklav lé in krime kontr’ demounité ; i demande lo 2 désanm i devien la Journé ëropéène an-souvnanse labolisyon lésklavaj ; i ankouraje bann Zéta manb po zot inskrire listoir bann demoun noir èk bann demoun koloré dann zot program marmay lékol.

An-Franse, la loi Taubira i arkoné la vante zésklav èk lésklavaj konm krime kontr’ demounité lété voté lo 21 mai 2001. La loi i porte le nom Christiane Taubira, député Lagwiyann, akoz èl la-fé lo propozisyon d’loi avan èl i koze dessi ça dovan l’Assemblée nationale.

Lo parlman Lërope la-proklame ossi dann son rézolusyon, adopté par 493 pour, 104 kontr’, 67 labstansyon, « La vi demoun noir i konte ». Parlfète, lü prande fétékoz po le kozman Black Lives Matter, kozman mouvman toute la tèr lé sorti Zéta-Zuni kontr lo rassism èk la violanse la polisse.

Dann son tèks, lo Parlman « i kondane bien-bien for la mor térib George Floyd Zéta-Zuni, i di parèy po toute mèm kalité lassassina partou dessi la tèr ». Lü amontre son soutien po bann maniféstasyon dernié tan kontr’ rassism èk préféranse rassial, lü kondane « suprémasism blan toute sorte manièr».

Po konète plüs