Dokümantèr dessi lëv po la mémoir La Porte du Retour dessi lil Goré (Sénégal)

Lané 2012, dann in rézidans artistik dessi lil Goré, la plastisyène Migline Paroumanou la-réalize in linstalasyon po la mémoir i apèle La Porte du Retour.

Porte blan-la, viré par koté losséan, té konm in répons sinbolik par rapor la Porte lo Voyage sans retour. Ça, té po amontre la possibilité artourné épila po bann fanm, bononm, marmay dérasiné rotrouve zot dinité.

Lartis té i éspère porte-la va tonbe konm in sinbol po lo rotour bann zam égzilé depi tro lontan : inn ti fanal léspoir, in landroi po bann déssandan zafrikin i rotrouve la pé ék la guérizon. In landroi ouça lo passé i arvyin jiska zot po mète la pé dann zot mémoir, po pérmète shakinn rokonstrui alü.

Lëv-la té bon marshé, lété pa fé po reste lontan, mésoman lü la tienbo plüs ke zot té majine. Jordi bann zintanpéri la-abime alü, la bézoin i rofé alü.

Füramézir èl la-rankonte demoun dessi lil Goré, lartiste la-konpri koman bann zabitan lavé mète La Porte du Retour dann zot kër. Son fors sinbolik épila son plasse dann zot vi touléjour, la-done lartiste in volonté rofé alü, so kou-si plüs solid po rèste dan lo péyzaj Goré po toultan.

Lo dokümantèr Alaxandre Boutié va prézanté po lo 8èm édisyon lo Gran 20 déssanm i amène anou dessi shomin sinbolik-la.