In lomaj po Diana Ferrus (1953-2026), fonnkézèz Lafrik du-Sud

Diana Ferrus, la énéte lo 29 out 1953 Worcester, dan la réjion lo Kap (Lünion Lafrik du Sud), épila lé mor lo 30 janvié 2026. Èl lété inn anparmi bann gran poèt èk bann portër la morale Lafrik du Sud koméla. In fonnkézèz, lékrivéne épila militan, èl la-bati son lëv po ardone la dinité, porte la voi tout çak la pa niabou kozé dann tan lésklavaj èk lapartéde.

Son nom i rèste kosté èk çat Sarah Baartman (la vénus Hottentote). Lané 1998, dann A Poem for Sarah Baartman (I’ve Come to Take You Home), Diana Ferrus la-fé èk la poézi in laksyon po la jüstis. Tèks-la lété vréman inportan dan lo désizyon fé artourne Lafrik du-Sud lo kor Sarah Baartman, li prande son part po la réparasyon in linjistis istorik épila po ardone son dinité in madanm démounizé dan lo pratik kolonial.

Lëv Diana Ferrus i tashmanièr mèmtan ardone in nom èk la mémoir tout bann viktim lésklavaj. Son poèm « My Name Is February » i rande in lomaj bann zésklav noyé dann bato négrié lo Sao José, la-fé nofraj o-larj Cape Town dann in nuite loraj mois d’déssanm 1794 ansanm parla 500 zésklav anndan. Dan lo Cap, bann zésklav té i pèrde zot lidantité lèrk zot té i arive, té robatize azot èk lo nom lo mois zot larivé, in manièr po démounize azot.

Mémoir an partaj-la té roprézanté lèrk la-fé la komémorasyon labolisyon lésklavaj lo 20 déssanm 2023 dann müzé istorik Villèle. Diane Ferrus té invité, kosté sanm in délégasyon bann Iziko Museums of Cape Town, po lokazyon in lantante rantr’ La Rényon èk Lafrik du Sud. Lo müzé la-akèye po ça léspozisyon « My Name Is February », in manièr fé koze listoir lésklavaj lo Cap èk çat La Rényon épila Losséan indien. La prézanse fonnkézèz-la dan so landroi sinbolik i rapèle anou koman la mémoir lésklavaj i gatüre bann kontinan épila la poézi i gaingne tonbe in léspas po la rokonéssanse, po artrouve la dinité.

Jordi, Départman La Rényon èk lo müzé istorik Villèle i di aèl granmèrsi.