Paulin Ismard issi La Rényon : troi konféranse po réfléshi épila transmète listoir lésklavaz

Po lo 25èm lanivèrsèr la loi Taubra, jist lèrk travo po bati lo nouvo müzé listoir lésklavaj i komanse, lo Départman La Rényon èk lo müzé istorik de Villèle i rouve in nouvo ron po réfléshi épila kozé par rapor listoir lésklavaj, ansanm Paulin Ismard, in proféssër listoir antik dan l’École des Hautes Études en Sciences Sociales, in léspéssialist rokonü listoir lésklavaj, lü la-roganize lékritür koléktif po lo livr’ Les mondes de l’esclavage.

Lésklavaj la-travèrse listoir lo monde èk çat lümanité

Lésklavaj i konsèrne pa jüst bann sossiété kolonial koméla. Lü la-égziste diféran manièr dann in bonpé sossiété, dann plüzièr période listoir. Lèrk nou étüdié bann léspérianse-la, i pèrmète mié konète çak lété parèy dan lo bann diféran lorganizasyon po la dominasyon, épila konprande par koman shakinn lavé son prop manièr-fé.
Bann konféranse dann mois d’séktanm 2026, lé fé po agrandi la réfléxyon dessi lésklavaj, par inn konparézon rantr’ lésklavaj dann tan la Grèce antik épila lésklavaj kolonial dann Bourbon. Par rapor lo bann kontèks istorik, ékonomik, jüridik épila sossial, diféran po vréman, nou vë niabou amontre bann diféran manièr lavé, po défini lésklavaj, lo diféran rapor rantr‘ lésklavaj èk la liberté, lo diféran kalité dominasyon, lo bann rézistanse, koman té i roganize lafranshisman èk lo léritaj bann sossiété ésklavajist.

Troi rankonte po diféran püblik

9 séktanm : konféranse 17h45 dann Centre culturel Le Sud Sin-Piér po bann zanségnan.
Po inskri : reservationenseignant@gmail.com

10 séktanm : rankonte 17h45 dann Lünivérsité La Rényon, Faculté des Lettres et Sciences Humaines – Lanfitéat Elie, Sin‑Dni. Gratuit.

11 séktanm : Ronnkozé èk Paulin Ismard épila Prosper Eve, rantr’ listoir lo monde èk listoir La Rényon, 17h45 dann Centre culturel le Sud, Sin-Piér.
Po inskri : reservationtoutpublic@gmail.com.

In vizite an-rapor èk la konstrüksyon lo müzé listoir lésklavaj

Program-la lé po fé vive depi koméla, lo bann késtion proshin müzé-la nora po done réponse : Koman rakonte listoir lésklavaj ? Koman i fé rante listoir lokal dann listoir lo monde ? Koman fé antande léspérianse bann demoun ésklavizé ? Koman transmète listoir-la bann nouvo jénérassyon ?

25-an apré la loi Taubira

25-an apré la loi Taubira té adopté, an-plüs ke fé rokonète listoir la trète èk çat lésklavaj, i fo niabou ashève konète alü, rode ankor bann doküman, transmète alü épila fé d’ot sobatkoz ankor.