10 mé : journé nasyonal po la mémoir la trète, lésklavaj épila zot labolisyon

Po lokazyon la journé nasyonal po la mémoir la trète, lésklavaj épila zot labolisyon, lo müzé istorik de Villèle i amontre in léspozisyon i rogroupe bann zobjé pokor-sorti, i vien’ ashté épila la-amontre demoun promié kou po lo 20 déssanm 2025. Léspozisyon-la lé fé ossi po marke lanivèrsèr la loi Taubira, i rokoné la trète èk lésklavaj konm « crimes contre l’humanité ».

Anlèr létaj lansien kaz bann maîtr’, léspozisyon-la i mète anlèr bann zobjé i sorte lépok lésklavaj. Çat i vien’ ashté-la, lé po ranforse bann koléksyon lo müzé épila i ède po mië konprande listoir po vréman, mèmtan i rolève lo travaïy dessi la mémoir la-fine angajé.

Füramézir i dékouve par égzanp :

• in makète bato Le Mercure, i rapèle lo bann voyaj èk lo bann kondisyon la trète ;
• bann fèr zésklav, lo matérièl po lassèrvisman ;
• bann zarm po la trète ;
• in lékümoir do-sük, in lartéfak lo sistèm prodüksyon kolonial ;
• in lakouarèl pokor-sorti i roprézante labitasyon Rivière du Mât, Xavier le Juge de Segrais la-pinde dann zané 1900 parla.

Èk bann zobjé-la i vien’ rante dan lo bann koléksyon, léspozisyon-la i vë amontre koman lété po vréman, çak na pwin tro dann livr’, épila fé réfléshi demoun par rapor léritaj lésklavaj dann nout sossiété jordi. I rante dann lo travaïy lo müzé istorik de Villèle i vë fé koze ansanm listoir, la mémoir èk la sitoyèneté, mèmtan mète anlèr bann kozman èk bann trasse lo passé.

« Po aspère lo müzé, in bann pokor-sorti dessi listoir lésklavaj »

Le Mercure

Éric L’Émaillet

Lané 2015

Boi poirié, métal, koton

Le Mercure cé in bato lontan la Compagnie des Indes té i ansèrve po la trète. Lü té i trafike dan la zone Losséan Indien, lü la-amène Bourbon 26 zésklav té i sorte Linde. Jean Boudriot la-fé in létüde monografik dessi bato-la, la-pèrmète lo makétiste-bato Eric L’Émaillet fé in makète lo bato tèl ke lété vréman, léshèl 1/48èm, san ashté okinn pièsse. Lo travaïy la-komanse lané 2012, la-düre 3 zan.

Pistolé tronblon, la trète, la marine

Fin 18èm sièk

Boi, métal

Larm-la té i ansèrve souvan dan la marine po fé labordaj, po anbare lo mütineri bann marin sinonça bann révolte zésklav té i arive tanzantan dann in trafik la tréte zésklav.

La shène po lo pié zésklav

1é moitié 19èm sièk

Métal

Shène-la lé po bloke bann mouvman zésklav. I défande azot fé d’gran-pa po koure vitman an-ka k’zot i rode shapé. Shène-la i sorte dan lansien labitasyon lo Gol, inn rantr’ bann plüs gran kaz Bourbon, ouça lavé jiska 600 zésklav avan lané 1848.

Pistolé la shasse, di « de Mussard »

18èm sièk, 1730-1750 parla

Boi, métal

Pistolé kourte deu kanon po tir a-toushé, bann shassër maron té i ansèrve dann boi, akoz té difissil manëve èk füzi lèrk lété dann véjétasyon tro épé. I apèle « de Mussard » (shassër maron sélèb) parsk lü sorte dan la famiy Mussard. Cé in pièsse anblématik po lo müzé.

Shoval do-boi, joué po marmay

Fin 19ém sièk

Boi, metal, kuir

Shoval do-boi cé inn rantr’ bann joué ordinèr bann marmay lo maitr’ té i ansèrve po amüzé. Bann joué-la i sorte dan bann latlié la métropol, té i inporte po réponde la demande lokal.

Shominn-kroi

2èm moitié 19èm sièk

Tèr kuite pinde, kadre an-boi

Lavé instale in promié Shominn-kroi èk 14 tablo lèrk la-konstrui la shapèl lané 1843, mésoman in bonpë tablo lété abimé dann siklone 1858. Dann 2èm moitié 19èm sièk la-komande in nouvo Shominn-kroi. Sédla ossi sora abimé lané 1932 apréça lané 1936, toujour akoz bann siklone, épila va ashève abimé jiska son linskripsyon konm monüman istorik lané 2020. Jordi i rèste jüst 10 léstasyon dessi lo 14 dorijine. Lané 2024, lo shominn-kroi té rénové, grace lo soutien la Fondation pour la Sauvegarde de l’Art français. Va amontre lo püblik la 12èm éstasyon, « Jésus meurt sur la croix ».

Kayanmb

Firmin Viry

Lané 2018

Grène konflor, tij flër kann, tij shoka, la po kabri

I sorte Lafrik. I kriye ali « chiquisti » sinonça « kaembe » dan lo sud Mozanbik, Kénya èk Zanzibar i kriye ali « kayamba », Madagaskar « raloba », Anjouan èk Mayotte « mkayamba ». Bann promié gravür i amontre alü i date depi lané 1848.

Bobre

Johny Bily

Lané 2018

Kalbass, boi jone, flë shoka, boi golète, fëy vacoa, grène konflor

Lo bob cé in linstrüman tradisyonèl i sorte Lafrik, cé in léritaj lépok lésklavaj. Cé in léspèsse lark, fé èk do-boi dür èk in kalbasse (po la rézonanse). I ansèrve alü souvandéfoi dan la müzik tradisyonèl La Rényon épila po akonpagne lo mouvman bann moringuër.

Roulèr

Stéphane Grondin

Lané 2018

Boi d’shène, la po bèf, fèr

Lo roulèr, (lontan té i di rouleur), i tonbe dann famiy bann manbranofone. Cé in tanbour barik do-boi i trouve rienk La Rényon, akoz par rapor lézot tanbour bann péï otour, lé sirtou bann tanbour dann in kadr’, alü toussël lé pozé atèr dessi in kal i apèle santyé. Saspë son zansète cé lo tanbour konik (tanbour vouv, ousinon tanbour long), na pü jordi mésoman lontan lavé dann bann likonografi, lü rossanbe lo atabak Madagaskar (néna ankor dann Sessel, i apèle tanbour séga).

Lékümoir do-sük

1é moitié 19èm sièk

Métal

Souvandéfoi, bann zésklav té i ansèrve linstrüman-la po fé do-sük. Lü tonbe parèy in gran passoir pti-trou, plü souvan an-kuiv, èk in gran mansh do-boi, po pèrmète bann « esclaves de batterie » tire léküme dessi la sürfasse la shodière lèrk té po fé lépürasyon. La-rotrouve lobjé-la dessi lo site lèrk la-fé in shantié patrimonial dann zané 1990.

Bann lankraj lo mür (süpor po bann bare, zano)

19èm sièk

Fèr forjé

Dan lo bann kaz, lavé dessi bann batiman lésploitasyon, in bonpë zafèr po lakroshaj sélé dirèkteman rantr’ bann moilon ansanm in mélanj la sho èk la sab. La-rotrouve bann lankraj-la lèrk la-fé in travaïy réstorasyon dessi térin de Villèle. Té i ansèrve azot po pandiye bann zoutiy, sinonça bann larné po zanimo, ousinon po süporte bann bare po parke zanimo.

Süpor po laxe in mashine po fé do-sük

19èm sièk

Fèr (mélanj fèr èk bronz)

Lobjé-la néna souvan dessi bann mashine èk in laxe i pèrmète fé tourne bann pièsse mékanik. La-rotrouve alü dessi lo site apré lo siklone Garance, lèrk lavé dékape lo térin épila lavé mète lo pièsse-la déor. Lü sorte èk in pti mashine épila lü néna ankor son palié an-bronz. Lo palié i tonbe lansète roulman a-bille bann mashine koméla. Lo bronz lé in métal « otolübrifian », té i ansèrve alü po diminüé lo frotman rantr’ deu pièsse métal an-mouvman.

Morso lékipman lo sheval

Promié moitié 19èm sièk

Fèr forjé

Dann 19èm sièk, i déplasse a-pié sinonça èk zanimo sharoi. Morso-la té i fé parti lo mor-latlaj. La-rotrouve alü dessi lo site lèrk la-fé in shantié patrimonial dann zané 1990.

Viroles de filtre Taylor

1é moitié 19èm sièk (1832-1848 parla)

Métal

Bann virol-la cé in légzanp lo pti matérièl té i ansèrve po fé do-sük. La-rotrouve alü lèrk la-fé in travaïy réstorasyon patrimoine dessi térin lo Müzé. Bann virole-la i sorte èk in filtr’ Taylor, in laparèy po filtre lo siro i gaingne lèrk i fé évapore lo vézou dan lüzine do-sük.

Tét piosh

19èm sièk

Métal (fèr forjé)

Linstrüman-la, i manke lo mansh an-boi, lété in zoutiy bann zésklav i apèle « Noirs de pioche », apréça bann zangajé « labourër » té i ansèrve touléjour dan zot travaïy agrikol. La-rotrouve alü dann in shantié patrimonial dessi lo site lo müzé. Cé in pièsse anblématik po lo müzé.

[Anse des cascades]

Adolphe d’Hastrel de Rivedoux

Lané 1837

Lakouarèl

Lakouarèl-la i roprézante dovan, a-droite, in péshër, assiz dessi son kanote, lé po aranje son filé. Par dèrièr, a- gosh, in famiy zésklav. Deu moun, assiz dovan lo pti kaz lé po oküpe lo manjé, épila in troizièm i trape do-lo la kaskad. Lo ranpar, lo kaskad, lo rivièr èk lo péshër i garanti : ça i éspasse dovan bann kaskad, jüst koté l’Anse des Cascades, Sinte-Rose. Lo kaz i tonbe dann kan labitasyon Charles Lenoir, i rèste tèrla.

Sint-André, Riviér du Mat

Xavier Le Juge de Segrais

Fin 9èm sièk

lakouarèl

In lakouarèl rare i roprézante inn rantr’ bann promié domèn sükrié Bourbon (lané 1816) kosté ansanm la Rivière du Mât. Lakouarèl i amontre la pozisyon bann langar po la bagasse dessi lo plato i domine lo li la Rivière du Mât, ouça in kanal té i sorte po amène do-lo dan lüzine do-sük.

Piano forté karé

Érard

Lané 1785

Boi, livoir, métal

Erard lé in fabrikan fransé zinstrüman müzik, sirtou renomé po bann piano, mésoman lü fé ossi klavsin, pianoforté, arpe. Dessi linvantèr apré la mor Ombline Panon-Desbassayns lé marké néna in piano mèm fabrikan, mèm lépok. Ça i amontre la plasse po la müzik èk la kültir, dan famiy la bourjoizi-la. Lo nouvo parkour dann müzé va éspoze piano-la po amontre koman banna té i vive.