Stèl Jéréon èk Jasmin

Landroi : Sin-Dni – Barashoi
Lané 2013
Lartist : Henri Maillot
Skültir
Bronz

Lané 1811, po réklame zot libèrté, bann zésklav Sin-Leu i révolte kontr’ lo sistèm lésklavaj. La-kapaye 145 rantr’ zot, la-mète azot la jol Sin-Dni, la-kondane 25 a-mor. Jéréon èk Jasmin lé anparmi lo bann révolté kondané, épila dékapité Barashoi lo 10 avriy 1812.

La ville Sin-Dni la-komande travaïy-la po onore la mémoir bann zésklav la-bataye po zot libèrté, po fé rapèle anou zot linportanse dann listoir La Rényon.

 

 

Lo skültër portoi Henri Maillot la-fé léstatü bronz-la, i roprézante in sël lésklav.

 Lü deboute, lo deu janm rèd an-bar, kosto èk son fièrté. Lü porte, konm in trofé, son prop tète i vienn koupé. Konm in jèst sinbolik, malgré son süplisse, lü vë amontre son konba la-pa sèrve po rien, i fo nou ansouvien.
Reprézantasyon-la lé vréman térib, soman zot i kroi lé plüs for çat bann krüssifi dann kroizé d’shomin ? Listoir, nout listoir la-bezoin bann repèr. Mwin té vë fé in monüman définitif, parlfète, koça ou i pë dire ankor apréça ? Lo soubasman parèy in kone i fé majine lil dessi la mèr, lé-O, la tèr la libèrté, lo refüj bann zésklav maron. In bann roz an-bronz lé dépozé dovan lo pié lo süplissié.
Deu landormi i travèrse dessi lo bann flër. Zot i rapèle nout latashman étèrnèl èk la natüre, épila i sinbolize linosanse.

 

 

Dann la Grèce antik lo sinbol (sumbolon), dann son sens prop dorijine, lété in morso potri kassé an-deu, épila partajé rantr’ lé deu ki tonbe dakor, po tashe manièr rakorde lé deu morso po fé la prëv zot mèm rassine, konm in signe rokonéssanse. Parlfète Jéréon i porte épila i rekole son prop tète, in signe konm-de-koi lü lé antié. Lo travaïy lé brute éksepré, konm in lamorse. I fé majiné. La matièr, parèy la lav, lé an-mouvman.

 

En savoir plus