Nouvo kontribusyon
Bann zarboutan lorganizasyon lo travay bann doméstik dan la kaz. Lo klasman, lorganizasyon épila koman té i prézante

In lartik Thierry-Nicolas C. Tchakaloff konsèrvatër émérit dann müzé bann zar dékoratif dann Losséan Indien (La Rényon) la-ékrire.

Dann in lépok san mashine otomatik ditou, lé oblijé néna bann sèrvitër dann toute bann famiy rish. La bezoin in bonpé la min èk lo-tan po fé tout çak néna po fé dann in kaz touléjour. Lo bann doméstik komandé par lo bann maitr’ i marshe konm in pti lantropriz organizé depi an-lér jiska an-ba, èk son bann shèf, sou-shèf, bann léspéssialist èk bann manëv.

Toute lo bann livre pédagojik dessi la rolasyon rantr’ maitr’ èk sèrvitër té i ogmante dann 18èm sièk, i prande modèl dessi la Maison rustique, séléb dann Losséan Indien. Livre-la i mète an-plasse lorganizasyon, po léspasse konm lo sossial, dann in labitasyon bazé dessi in « maison de maître ». Labitasyon-la i organize lo bann diféran léspasse konm lo bann diféran travaïyër kissoi agrikol kissoi doméstik, ranplassé par bann zésklav dan lo bann koloni.

Dan lo deuzièm moitié 18èm sièk apartir, in bonpé tablo i amonte bann sèrvitër anonime po fé zot travaïy èk kontantman.

Parkonte, bann zimaj la-arive èk nou, i amonte bann zésklav dann Maskarègn po travaïye, na pwin bonpé ditou, sürtou an-konparézon èk d’ot koloni. Manièr voir-la, i rotrouve par égzanp dann çak Jean-Joseph Patu de Rosemont i amonte po Lil Bourbon débü 19èm sièk, sinonça çak i rotrouve dann L’Album Jacques Gérard Milbert po Lil de Franse mèm lépok. Lo bann modèl Jean-Baptiste Dumas i amonte dann promié tièr 19èm siék, i konplète lo bann zimaj dessi bann zésklav toujour anonime.

Po in listorien lart, alé rode bann zimaj d’ot péï i pèrmète done la valër çak ou vë amontré si ou i tashe manièr trouve lo mèm kontèks, i korésponde çat lo mèm lépok. Bann zimaj-la i di bien koman i amonte ossi bann zésklav lé pa toultan invizib. Lo gran kantité zimaj par tème kissoi dann Karaïb, Brézil, Méksik, Pérou, Lindonézi, Linde sinonça bann jén Zéta lo Nor Lamérik, i amonte bien in réalité istorik k’i mérite in rogar plüs ofon, po konprande vréman, an-konparézon, lésklavaj doméstik dann Maskarègn.